jardinbaroque

Maître strasbourgeois anonyme du XVe siècle.
Le doute de Saint Joseph, c.1410-1420 (détail).
Huile sur panneau de sapin, Strasbourg,
Musée de l’Œuvre Notre-Dame.



Seulete suy et seulete vueil estre,
Seulete m'a mon doulz ami laissiée,
Seulete suy, sanz compaignon ne maistre,
Seulete suy, dolente et courrouciée,

Seulete suy en languour mesaisiée,
Seulete suy plus que nulle esgarée,
Seulete suy sanz ami demourée.

Seulete suy a huis ou a fenestre,
Seulete suy en un anglet muciée,

Seulete suy pour moy de plours repaistre,
Seulete suy, dolente ou apaisiée,
Seulete suy, riens n'est qui tant me siée,
Seulete suy en ma chambre enserrée,
Seulete suy sanz ami demourée.

Seulete suy partout et en tout estre.
Seulete suy, ou je voise ou je siée,
Seulete suy plus qu'autre riens terrestre,
Seulete suy de chascun delaissiée,
Seulete suy durement abaissiée,

Seulete suy souvent toute esplourée,
Seulete suy sanz ami demourée.

Princes, or est ma doulour commenciée
Seulete suy de tout dueil menaciée,
Seulete suy plus tainte que morée,

Seulete suy sanz ami demourée.

Christine de PISAN (c.1364-c.1431?),
Cent ballades (1396/99), Ballade XI.

"Spiders and Flies", chanson extraite de l'album All is dream de Mercury Rev, écrite et composée par Jonathan Donahue, Sean Mackowiak et Jeff Mercel. P&C 2001 V2 records (WR1017522).